呔仔2歲8個月。細細1歲5個月大

哇哈哈~~ 大家睇到呢個標題係咪好興奮呢~~??
我自己都好鬼開心。真係好耐無寫佢兩個既成長日誌啦~~
有成5個月無寫喇。。
無辦法。之前返左香港玩。返完香港又趕住交稿。。
真係而家先開始得閒少少。。
追卜之餘。都寫記低下佢地既成長啦~

好想寫返之前。真係有心無力。。
我自己當然有KEEP。我有大大本月曆。平時記低晒佢地既野架~﹗﹗
由呔仔出世到而家。第3本了~~

好啦講下呔仔先~~

2歲8個月大

大個仔喇。打晒針。醫生話佢到4歲先要再打。爽~~

事隔5個月。講野進步左好多好多。算幾清楚。朋友都聽得明佢講咩~
除左不停講好多野之外。已經到左"問題少男"既階段了。。
佢既聲氣係 :
"媽咪。 FGH係咩黎??"
"咪就係ABC囉~"
"媽咪。ABC係咩黎??"
"係要黎OPQ既~"
"點解OPQ??"
我就會不停答。答到佢覺得佢知道點解喇。好清楚喇~

佢而家講好多野。組合句子好長喇。。
會話 "呔仔今日返工揾錢。買士多啤梨比媽咪食。媽咪唔會肚餓~" 
又或者 "呔仔要喱埋。等D螞蟻唔好搬走呔仔。唔好搬左出去街度。食左呔仔~"
 
佢講出黎既野都好有條理的。可以好清楚咁將幾件事連結~

呢排好鐘意扮恐龍嚇人~
但如果你鬧佢。佢又有d 唔順超既話。就會扮恐龍嚇返你。。
算係佢既"下台"方式掛?﹗ 哈~~~

每晚臨訓前。我都會同呔仔講故事。唱歌。又或者傾計~
傾返佢當日發生既事。叫佢講返比我知做過咩。又或者係佢既感受等等。。
(細佬都一齊架。佢好鐘意擒過我去攪哥哥~ 哈~)

前幾晚同呔仔傾計。問佢今日去摘士多啤梨好唔好玩~? 想唔想再去呀~?

佢答左幾次話 "唔好~ 唔想~"

我就問。"點解唔好架? 唔好開心嗎?"  佢話係~

再不停問佢每個答案點解…… 得出左個真相~~

原來係 : 呔仔見到螞蟻。驚。想媽咪抱。但無話比媽咪知。。

媽咪以為佢扭計無 ​抱佢。話左佢兩句。佢唔開心。所以唔想再去摘士多啤梨~

噢~ 我都唔知原來係咁 (其實堅定流架呢? 哈~)

之後同佢解開左呢個心結。再問佢。佢就話想再去。同埋今日好開心 ​喇~ 哈~~

呔仔大個喇。開始識表達自己。識講出自己既感受~ 好感動呀~~

佢好鐘意拼圖。好有心機呀~
而家可以自己一個拼一幅36塊既拼圖。開始識分類去拼。。
係佢自己研究的。我覺得佢分析能力高左好多~

另外除左BB Lego之外。佢都鐘意玩大仔Lego。。
我見細細無擺野落口。所以開左盒比佢地玩~
呔仔好鐘意呀。用Lego整好多野出黎。創意十足~

另外呔仔除左識唱"小星星"之外。仲識唱好多歌喇~
Thomas幾首歌。Bob the Builder。Fireman Sam。。
麥兜。噢~聖誕樹﹗。畫叮噹。大包等等…
佢成日自己口up up 。不停唱。讚佢會陰陰咀笑。。
但你叫佢唱佢就會話 "唔好~"

食野方面。同之前一樣都係3杯牛奶。2餐菜肉飯。生果小食等。。
不過佢兜飯真係好大兜。同大人無咩分別~
(你見佢咁兜就知啦~)
加上佢係包底王。細細食剩既我多數餵埋佢~ 哈哈~~ 谷肥﹗﹗
不過食飯就唔係咁叻喇。仲餵緊~
其實可以等佢自己食。不過太慢。我頂唔順。。
平均我攪掂佢兩個。一餐2粒鐘無走雞架喇﹗
有時3粒添~﹗﹗
我唔想全日煮飯餵飯呀﹗﹗我既Traget係1粒鐘攪掂佢地﹗﹗

戒片方面。試過叫呔仔坐potty。不過佢坐唔定。。
加上細細一定拍門。入到黎又攪哥哥大脾。真係好困難。。
大家有咩戒片辦法。請提供一下~ 唔該晒~~~

同細細感情唔錯。平時會爭野。但到緊急關頭。都會保護細細的~
呔仔好善良。會保護身邊既人。感情又豐富~
發現佢好怕離別既感覺。我地一走。佢會即刻谷眼淚。。
勁愛我地。朝朝起身都攬住我黎錫~
好痴身。我去個廁所佢都要跟埋入黎~
如果玩玩下發現唔見左我響身邊。就會大嗌四圍揾我。會喊話掛住媽咪~
又會保護媽咪。唔比人蝦媽咪。。
(老爺扮蝦我。呔仔會推走爺爺。即刻錫返媽咪~ 勁心甜~~~)

好喇。到講細細喇~~

1歲5個月大

呢幾個月真係高左好多呀﹗﹗
好多褲都吊腳了。之前響香港岩著既褲。吊左2吋都有﹗
前排返到黎。不停谷佢食飯。補番之前返香港食少左好多。。
幾成功。佢個兜出返黎。總算無咁呃秤。真係肥左架﹗﹗

細細識講好多生字啦。。
可能係聽得哥哥多。佢講野比較快。表達得好好~
識聽好多野。指令。表情佢都好明白。。
識講就有 :
爸爸。媽媽。爺爺。嫲嫲。婆婆。多多(哥哥)。借借 (細細)
波波。woof woof。Gees (Juice)。ba-ba (花花)。浮8 (頭髮)
woo-吱-Bi(Woody)。Jiu (蕉)。 雀雀。 吱吱 (呢D果D)….
仲有好多係跟哥哥講既野。佢都好多野講架﹗哈~~

開始識還拖。哥哥搶佢手上既野佢會唔放。鬥搶。又或者即刻走人~
多數都係比哥哥蝦架喇。走唔甩~~
哥哥搶左佢野。佢會喊住走黎要我抱。之後又無事架喇。。
佢同哥哥好多時係爭爭下野。無啦啦又會笑。。
佢地既相處方式~ 哈~~
如果唔係太過份。我好少插手。由佢兩個自己攪掂~~
不過我見過細細打完哥哥。哥哥還手。佢就喊~
好彩見到。唔係就怪錯好人~哈~~
呢個細細仔都係奸仔黎架﹗﹗

出緊第9﹐10隻牙。下面4隻既2旁~~
絕食媽媽飯2個星期﹗哼~~
無辦法。軟硬兼施。垃垃雜雜。又肯食Baby Food。。
無辦法啦。總之有野到肚。好過齋飲奶~~
今晚好少少。開始肯食番飯。半碗都好丫。乖~~
所以我幾時都話。小朋友唔怕肥的。儲定脂肪絕食時有得用丫嘛~﹗

出街食野表現十分好。鐘意自己"不"野食。差不多唔使理佢~

細細真係好鬼專一。仲係鐘意波﹗踢波好勁呀﹗﹗
仲要一見到"圓形"就指住"波波~ 波波~~"
一定要話到比我地知~
出到街。見到咩都會指住。要我地話佢知係咩黎~
另外就係鐘意睇書。同埋執拾。。
真係好手尾到呢~~
佢行左黎玩玩具。叫佢擺低支奶。佢竟然爬返上SOFA擺返好原本位置。。
其實我意思係叫佢擺響地下架咋~ 哈~~~

性格比較衝動。無哥哥咁淡定~
扭唔到想要既野/ 想去既地方會嗌。但唔理佢都好快收聲既~
有時會尖叫。發爛。但好聽我講喎﹗
同佢講下道理。佢好似好明白咁。就唔會再扭~

(哇。2點。寫住咁多先。去相吧~~)

今晚的相~~
幫呔仔沖涼時影的。。

好鬼天真~~~

入房準備訓。。

講緊野~~~

古惑仔﹗﹗

想伸手過去攪媽媽D 野~﹗﹗

我們。。

兄弟sweet time。一齊睇書~

圓面似哥哥。。

細細影媽媽~~

今晚老公放工即刻OT 。。
早上7點出門口。做到晚上11點先返黎~
辛苦晒~~~~