呔仔兩歲。細佬9個月大

日期: 2010年11月11日上午05:02｜回應: 無回應｜瀏覽數

平日響屋企。我係好少時間可以坐低做自己野。。
唔係真係忙成咁。而係呔仔慣左不停咁拖我走。。
口中不斷 : BiBu BiBu~~~~
好似上左身咁。。

可能係樂在其中。雖然好攰但時間係過得好快。。

每早大約9點半起身。同佢兩足出廳。。
大家梳洗完。斟杯奶比呔仔。我就入廚房整我地三個既早餐。。
細佬早餐食生果米糊。超鐘意。可以食6-8安士。。
而呔仔就跟我。多數係粟米片之類。三文治。芝士雞蛋等。。

攪得黎食埋。玩一陣。都中午啦。又入廚房整午餐。。
細佬多數係爛飯。三文/ 雞 + 菜。有時係樽樽baby food。。
呔仔就食大人野。剪碎。。
由於我自己好淡口味。所以呔仔食既野。我好少放調味。。
其實我覺得三文魚。雞呀菜呀。本身都有味。最多落少少鹽。。

呔仔食飯都係自己食一半。我餵一半。。
一餐午飯。有時可以餵到weak7返黎都未食完 -___-""
不過我唔會放棄。除非真係好累。。
佢肯食。只係無耐性坐。。
餵埋細佬。自己食埋。其實大半日就咁過左去。。

到weak7返黎。有時出下去入貨。行下食下野。又到夜晚。。
而家較左鐘。個天6點都黑齊喇。又少左時間帶呔仔去公園玩。。
前幾日揾到個新場。好新既。有呔仔好鐘意既School Bus。佢勁開心啦~~

返到屋企晚飯+餵晒兩隻野後。都已經係9點幾。要沖涼訓覺了。。
爸爸同呔仔沖。我就同細佬沖。有時會調轉。有時又會幫晒沖兩個。。

上床訓覺。慣左同呔仔傾下計。唱下歌仔。。
細佬多數食食下奶就訓左喇。。
呔仔就不停講野。不停嘈住晒~ 哈哈~~~
琴晚不停講 "Boom Bi Bi"。嘈足半個鐘。。
究竟咩係 "Boom Bi Bi"呢?
就係 "com被被" 啦~ 即係覺覺豬囉~~~

佢地兩個訓左。就係我全日最放鬆既時候喇。。
終於可以坐低做下自己野。。

呔仔差不多每日都講出新詞語。近排有。。。
"Mi Mi" = 米米玩具
"兒鳩" (係粗口果音) = 泥膠
"扁" = 餅
"咯咯嘰" = 咯咯雞
"鳩鳩" = 兜兜
"呃嘰" = 乞嚏
"Kee加" = 結他
"B-Bop" = SpongeBob
校巴。巴士同巴斯都係 "巴"
所有紅色車。消防車警車。長梯都係 "BiBu"

識同我地jam歌。。
打開蚊帳有隻 "mum"~~
打開雪櫃有隻 "咯咯嘰"~~

做一樣明知我地唔比做既事之前。會自己講"得"~

開始有心機自己拼路軌玩火車。。
鐘意搭高高。搭到唔跌會自己拍手。會拉我地去睇~
讚佢就會陰陰咀笑。有時仲會掩住口笑~~

對住呢個小肥呔。實在太快樂啦~
不過都有激氣既時候。就係有時唔聽指令。又鐘意蝦細細~~

至於細細。活動自如喇。呢幾日仲可以唔扶野企到幾秒~~
爬得好快。超快~~~
好多次我以為有人跑緊出黎。原來係細細"呯呯"聲爬緊。跑爬~~~
又鐘意自己推walker行。之前見過佢行幾步呀。。
不過我就無專登教佢。由佢自己發揮。。
其實我想佢爬多點。果時呔仔11個月識行。都爬得少。。

細細講好多野。成日口up up。仲講過幾次 "Baba"。。
應該係叫 "Baba"先喇~ 哈哈~~~
上個禮拜開始。識叫人望佢。同佢玩。。
會 "呀~ 呀~ 呀~~" 咁叫我地。。
爸爸同佢玩玩下喱埋。佢會"呀~呀~~" 叫爸爸出返黎~~
單手撐起。將個頭望上天花板。就好叻架喇。叫我睇佢。之後就奸笑~~~

又鐘意同哥可爭玩具。成日攪亂檔。哥哥搭到好高。佢就一手整跌。。
所以成日比哥哥教訓~ 哈哈~~