呔仔1歲11個月。細佬8個月大 + 三段片

日期: 2010年10月16日上午12:01｜回應: 無回應｜瀏覽數

呔仔下個月就兩歲喇~~

33吋高
仍然係無磅重。而家一去到診所就想走頭。。
邊會埋位做呢d野丫。次次打完針都癲晒咁走人喇。。

重就一定有。因為抱佢唔到咁滯。應該過30磅了。。
呢兩個月d褲愈來愈短。都應該高左唔少。。

就快兩歲。呔仔大個左好多。好多野都好有條理。。
仲愈來愈幫得手添。經常比我地老點。。
而家佢會幫手褶衫(攪亂)。褶好後我就會分一部份比佢。同我一齊拎入房。。
都好叻仔。好小心唔比佢地跌落地架~﹗
又鐘意執d細細粒垃圾去垃圾筒。連一條頭髮都要行一轉走去掉。。

食野方面。除左3杯奶。兩餐正餐外。都食好多生果。零食等。。
早餐都食多左野。麵包。芝士。蛋。 cereal 等。。
而家都好少食爛飯了。因為爛飯要餵。。
反而食粉麵。食飯就會自己食。。
多左用餐具。但仍然鐘意用手。唔會迫佢。由佢~~

講野每日都有進步。愈講愈多。好多驚喜呀~
出街見到野。會突然指住爆個字出黎。。
原來佢記得好多字。只係未講。。
好似上次去南瓜場有幅 nemo畫。佢指住條魚話" mi毛..mi毛.."
前日同佢去公園餵雀雀。佢渣住袋野話" 便包..便包 ..(=麵包)"
好多次會跟我地口水尾。最正係有次唔知睇咩電視。
我講左句 "哇。勁賤格呀~﹗﹗"
呔仔就即刻 "賤格.. 賤格.."
仲要第二日仲講緊。而家得唔閒醒起又會講~~

品行方面。未踩過我底線 (因為我都無咩底線)
但就成日唔聽老豆支笛。下下唱反調。激到weak7 屎屎下~~
兩歲。而家先開始難教。算遲架喇爸爸~~
比d心機啦。遲下返左學仲難攪呀~ 哈哈哈~~~

講開返學。遲下加洲可能改例。9月前足5歲先入得幼稚園。。
呢邊幼稚園讀一年。就上小一架喇。。
咁即係呔仔5歲10個月先可以入K。。
當之前讀兩年 Preschool 的話。都仲有兩年先入學。。
正呀~~~ 仲有兩年可以日對夜對。哇哈哈~~~

細佬呢~ 8個月喇。21磅 / 28吋高
今個月大進步呀。。
由反身。到想爬。到真爬。快爬。到扶企。扶企行。。
都係響呢個零月內發生。真係利害~~
不過細佬就爬得比呔仔多。因為屋企有地毯。唔使圍住佢。。
而家細佬好鐘意爬入房果條行。又想望下廚房係點。。
有時我同呔仔響房/廁所。佢就會邊爬邊嗌。好快會響我地面前出現~
依個仔極度痴身。只要一唔見我地。就會即刻放下手上玩具。爬去揾。。
總之一定要有人。先至夠安全~~

食量就3餐"半固體"。咩都食d啦。有時會食哥哥d爛飯。整稀少少。。
多數都係食雞肉。菜。米糊。再加零食星星餅米餅等。。
佢就食奶多過哥哥以前。。
記得呢個時候。哥哥食完糊仔後。都係飲水。。
但細佬食完一大兜。仲會扭食奶。係食一餐奶既分量。唔係濕下口。。
所以佢都幾大隻。幾重磅呀~~

上兩星期識啜哥哥個水樽。勁呀~~
未用過奶樽。連鴨咀杯都skip埋~~

訓得超勁衰~~ 雖然已經無左濕疹既困擾。但一晚醒幾廿次。不斷醒。。
要啜奶先訓返。又或者坐起身抱。成晚不停嗌。。
有幾次唔理佢。佢嗌完會自己訓返。但已經嗌醒左哥哥。。
咁細個。已經識用哥哥黎威脅我。嗚嗚嗚~~~
唔知幾時會自動戒夜奶。唔知幾時會一覺訓天光。唉~~
唔通又要"特訓"佢? 真係時候要做下野喇。。
不過細佬係絕對喊得慘同嗲過哥哥既。心軟少少都比佢得逞架~~