卜友們。大肚問題

日期: 2009年07月30日上午03:28｜回應: 無回應｜

哈哈~~ 我係Kelly呀~~~

仲有一個鐘。呔仔就食lunch。老爺湊住佢。我可以寫卜啦~~
不過無相呀。因為之前去check-up既相未執。。
一陣講得黎。又解答唔到大家既疑問。。
我都係靠記憶回答。答漏左。可以再問我~~

其實。呢次大肚。我係無咩問題既。哈哈~~
大家好似同我一齊大肚咁。勁開心。加勁多野想知。。

我之前一路睇"無獎問答" 果篇卜。一路笑。。
幾鬼開心~~ 因為你地講野好鬼正~~~
無啦啦個個變晒 """偵探。幫我遂點分析。。
之後又好多卜友自爆大肚腩。便秘。唔修身。。
哇哈哈哈~~~~
其實。餵人奶真係自動修身架﹗﹗
生完4個月左右個肚已經平返晒。無做運動。。
所以。媽媽們真係要餵。 BB好自己又好。餵得幾多得幾多~
當然。媽媽瘦返。呔仔都唔少功勞啦﹗﹗

餵人奶。係無period。但一樣會排卵。。
所以係一樣會有機會大肚既~~
不過。如果BB頭幾個月。不斷食。餐餐食。就會抑壓排卵。。
所以係好微機會有BB。但無野100%。。
而如果BB 5-6個月。開始食人奶以外食物。。
就更大機會排卵。會有BB。所以。。
我大左肚了~~~~

意外定計劃??
呢個。係有計劃既意外。。
話說有一晚。睇返呔仔好細個時既相。實在太可愛喇。。
我就話 : 不如生多個囉﹗(隨口up -__-")
我平時都成日話想中六合彩。上頭又收唔到。。
隨口up又聽得咁清楚~~
不過我地都有認真諗過。我地實在太鐘意BB喇。。
好大可能。遲D係想要多一個既~~
只不過。係早左囉。。
所以。都係計劃中既意外啦~~~

無錯﹗﹗細B係made in Hong Kong既~
呔仔唔係架。佢係果年情人節去滑雪攪出黎既~ 哈~~~
我地都覺得係天意。。
可能呔仔一早偷聽到爸爸媽媽話 "一個夠喇﹗"
無人同佢攪破壞。佢不知幾傷心。。
所以一返到香港就整病自己﹗等我地無得日日出街~~
又好乖咁晚晚訓得好好。等我地安安樂樂。就攪左細B出黎陪佢﹗﹗﹗
哼~~~~﹗﹗﹗
其實所有野都係呔仔plan出黎。我地中左佢計喇~﹗﹗﹗

至於呔仔。我係諗住餵人奶餵到佢1歲。就可以轉飲牛奶。。
醫生話無問題。不過當然。如果餵時子宮收縮。唔舒服。就要停喇~
我暫時OK。不過呔仔開始成日咬我~~
所以。都可能要泵出黎餵或者轉奶粉比佢~~
睇下遲D個肚大成點。再算~~

而家細B 13週3日。都過左3個月架喇~~
預產係下年 2月1 日
其實我地都唔係早你地好多知道咋~~
由於一直無period。都唔知有左。。
係之前好暈。暈到想嘔。好似陀呔仔果種暈。。
心大心細。先走去check下。。
點知一check。已經10週喇~~
(好彩check之前果晚。去左阿Cris間野。狂食魚生啫~ 哇哈哈哈~~~)
仲以為果排呔仔訓得好差。我唔夠訓先咁累。。
第二胎好快見肚架。而家個肚好似之前陀呔仔15週左右~~

其實對於呔仔仲細。就有細B。。
我又唔擔心噃。係一知道既時候我地唔係好接受到囉~~
可能我太樂觀啦。。
凡事都有好壞。有細B。對呔仔絕對係一件好事。。
對我地。當然一個夠啦。。
但都唔可以咁自私。為左自己生活好D。早D退休。甩身。。
就抹殺左呔仔有伴成長。一齊古古惑惑既歡樂﹗﹗
(諗起都開心~~ 以為我地唔知。兩野隻偷偷古惑。一定好攪笑~~~)

有卜友擔心我攪唔掂。其實都無得驚。。
如果無心攪。就算一個都係難攪架啦。。
湊左呔仔快9個月。其實無咩難度。係"耐性"兩個字啫。。
所以我都好有把握攪得掂兩件~~ 放心啦~~~
總之安全至上。必要時咪困住呔仔。由得佢喊囉。。

至於weak7。呢幾個星期。佢開始幫手湊呔仔啦~~
哈~~ 其實佢一直既身份係呔仔玩伴﹗﹗
我一直都自己湊呔。。
無論佢訓覺。食奶。餵佢。換片。暗佢訓。。
出世到而家。全部係我一手一腳攪。。
唔係人地唔幫。而係我唔想人幫。。
可能係一個病態。產後抑鬱??
我好驚人地攞左呔仔去湊。我好空虛。又訓唔著。。
總之我要時時刻刻攬住個仔至安樂~~
不過呔仔大大 o下。我地又返左香港。親戚都想湊呔仔。。
我先開始放手比人幫。。
而家就更加啦。我都有心無力。。
weak7好好呢。放工就幫手整粥。餵佢。陪玩。單拖幫呔沖涼。暗佢訓。。
等我晚飯前。可以訓幾個鐘。舒服好多。。
" i love u 老公"