又….特訓???

話說呔仔 5 個月大時。"特訓"過佢兩個星期。。
佢慢慢可以一覺訓 6 個鐘。早上5﹐6點食完奶奶又再訓過。。
我終於有覺好訓啦~~~
之後無啦啦話返香港。都驚定先架喇。好驚佢時差又亂過。又黎過。。
好彩。響香港果排都算唔錯。都係起一至兩次身。。
十分合作。可能係一直病。食藥。所以好累。。
不過佢醒。我要即刻抱起佢。唔可以比佢嗌。會嘈醒第朝要返工既家人。。

返到黎。時差又轉左兩個星期。。
時差攪掂之後。都正常過幾日。又開始衰返喇~~~
初時都以為佢出牙唔舒服。會好痴身。所以由得佢。。
諗住佢會自己變返好。。

不過。愈訓愈衰~~﹗﹗﹗
兩個幾星期喇~~   每晚都 2 -3 個鐘嗌醒一次。有時半個鐘醒一次添~~~
唔理佢就發癲。狂撐我。渣鼻。搣面。扯頭髮 
( 佢而家既能力係勁過5個月大時好多 -__-" )
仲衰到食返夜奶添~﹗﹗﹗﹗
一定要啜啜先肯訓返。比佢吹脹~~~~~~

真係攪到我半死。病埋。好暈好暈。頭髮又甩返多左。食慾不振。。
咁落去。對大家都無好處~~﹗﹗
一定要攪攪佢。出牙都係咁話 (又未出。哼~﹗)

今晚一於由佢嗌。由佢癲。。
最壞打算係"的"佢去隔離房訓~﹗等佢自生自滅~~ 哇哈哈哈~~~~
真係諗o下都興奮~~﹗﹗

"" 呔仔 ﹗ 精精地你今晚自己訓好D﹗唔係。咪怪我地唔客氣呀~~ ""