吹下水。。

日期: 2009年01月28日下午04:00｜回應: 無回應｜

自從生左呔仔之後。個卜好似變左做佢私家卜咁~

我知佢係好攪笑~ 不過都要停佢一次~﹗
因為我想同大家吹下水。講下心事啦。。

響我極速做左人地老婆同媽媽既日子裡面。。
其實未有好大感覺。。
丫。應該係未有時間去感覺。。
因為實在太快。都唔知自己做緊咩~~ 哈哈~~~
不過好好彩。所有野都黎得開心。。

有時候覺得。要深思熟慮去做一件事。左度右度。。
倒不如順其自然。永遠有人好過你。又會有人差過你。。
只要自己開心。結果可以接受既。就去做啦~~﹗

唔講你唔知。其實我地之前係諗住唔生BB既~ 驚呢??
哈~~ 主要都係覺得呢個社會好唔掂。小朋友第時會suffer太多。。
同埋我地想保持現有既優質生活。自悠自在。。
不過鐘意BB鐘意到咁~﹗
始終都係要生返一個半個黎滿足下自己既慾望既~~

前幾日講開。點解我地無啦啦多左呔仔。都幾攪笑~
生仔同玩相機一樣。。
其實唔係一個需要。而係一個嗜好~
因為鐘意。所以想擁有。。
既然玩得。當然開心最緊要啦~﹗
想將件事做到最好~ 就係咁簡單~~

有人話我係"天生湊仔婆"~
我開始相信啦。。
因為湊呔仔呢3個月(就快)。真係勁開心。仲有 D 唔夠皮~
(不過唔會生多個。呢個仔起碼玩我地廿年 )

客觀黎講。"湊仔"係一件好刻苦既事。。
特別是埋身餵人奶。無人幫到手。。
(其實我最鐘意埋身餵~ 哈~)
訓覺又要同個仔鬥耐力。佢扭幾耐我"暗"佢幾耐。。
最最最辛苦既莫過於。。
"呔仔小睡片刻神功"
無啦啦訓著。過一陣又無啦啦訓醒﹗﹗
每次以為暗到佢訓 (個樣好淋架﹗)
暗自歡喜。 9秒9撻落床。。
都未訓著。佢就嗌我啦~
1次。2次﹐3次………….
自問好脾氣既我。偶然都會忍唔住。背住呔仔"妖"佢。又或者"頂"佢一野﹗﹗
當然。唔得比呔仔見到啦~~ 哈哈哈~~~