呔仔2歲10個半月。細細1歲8個月大

9月中。呔仔2歲10個半月大喇~
身高 35吋    重 35磅半

自從細細同哥哥食埋同一樣飯之後。有意無意。哥哥做左"包低王"~
以前我細個都係咁。食唔晒D野。一定係阿哥包底~ 哈~
所以我阿哥細個都係肥仔一名。其實我都唔少野~﹗ 嘻~
由於食多左。呔仔呢期厚左好多。仲比我發現佢大脾內側多左兩舊肉﹗哈~
我最鐘意D仔肥 (因為我知到某個絕食位。就會用得上呢D後備脂肪﹗)

其實對上一次磅。好似係返香港之前了。4月果時32磅~
都重左唔少呀﹗手痛都抵~ 哈~~

呔仔而家講好多野。不停跟我地講。。
會將我地講既一句好長說話。一五一十講返出黎~ (所以唔好亂講野。嘿~)

不過呔仔講野唔係咁清楚。。
好似"食飯"。 佢就會講 "極扮"。。
之前都有好心卜友提過佢呢個問題。但都係無咩改善~
呔婆話會唔會痴脷根。醫生又話應該唔關事。。
refer左去語言治療。睇下保險批唔批。。
不過醫生話好多小朋友都係咁。佢細個都係講唔到個Si音。到三年級先改善。。
其實我又唔係咁擔心。不過可以早D改善當然係好事~
(P.S. 好心卜友們。請再提示一下。好難揾返以前D卜留言。麻煩晒~)

性格方面。我覺得佢都算乖。幾聽話。哈~
同埋佢好怕我嬲。或者唔睬佢~
有時佢唔聽話。我唔同佢講野。當佢透明。佢就會自己喊~~
之後就會 "Sorry 媽咪~ 我一陣間唔會蝦媽咪~~"
(係呀。佢好鐘意講 "一陣間" ~ 哈~~ )

唔知係咪都算怕怕地我。因為我唔會做開個頭。。
即係好多野一開始就會好惡。比佢知道係錯。係唔做得。。
所以佢而家好多野都會主動問過我。。
例如係 : "媽咪我食唔食得呢D~? "
"媽咪你比唔比我咁做~? "
我見琴晚老爺想比曲奇餅佢食。佢都話 "媽咪唔比我食呢D。會咳~"
我聽到覺得幾安慰呀~ 成日教住都係值得既~~
(Oreo呀大佬﹗未食D啖已經湧緊上黎~ -__-")

不過就唔係咁聽爸爸話。同爸爸包拗頸。叫東一定專登做西~
無辦法。媽媽係"最愛"。爸爸係玩具… (玩殘你都好正常~ XD)

平時有好多意想不到。笑到碌地既驚喜~
好似前幾日。爸爸以為佢自己行開左。惡惡地話" 我叫左你唔好行開~﹗"
 呔仔(不忿地) : " 我 明明 企響度﹗"
佢第一次用 "明明" 呀。仲用得好岩~﹗哈~

琴日我見到架唔見左好耐既火車。拎比呔仔睇。。
佢話 "你 終於 揾到~ 唔該呀~~ "
佢第一次用 "終於"。不過攪笑既係。我從來無揾過。佢又無提過要揾。。
做咩要講 "終於"~? 哈~~

上次去Reno。我地唔想呃住佢出門口。。
就同佢講。爸爸媽咪而家去睇演唱會。我地出左門口之後你就問爺爺攞包糖啦~
點知我地都未行得。佢猛咁話 "媽咪你地 直情 出門口~ "
(佢係想講 "而家" 但用左 "直情"。 哈~)
我地一走。佢即刻問爺爺 : "媽咪爸爸走左喇。爺爺你快D攞糖比我食~" -__-"

上次佢跑好快。我話 "呔仔你 快得滯 喇~"
佢話 "唔好 快得滯呀。 要 慢得滯~﹗﹗" XD
真係好難解釋 "得滯" 既意思~ 哈~~

而家佢好介意每個人既 "唔該 / 多謝"~ 哈~~
好似比左野人。就即刻話 "媽咪你唔記得唔該我~"
同埋比左野細細。又會話 "細佬做咩事唔講多謝~?"
哈~ 唔知係咪聽得多。而家哥哥比野細細。細細會講 "Thank you~" 哈~~

近排細細迷上WOODY。日日話要睇。。
呔仔睇得多。終於巴斯上身。。
猛話 "我係巴斯~ 我係巴斯~" "太空戰士。一飛沖天~~"
仲話我同佢都係"真巴斯"。爸爸同細佬係"假巴斯"~ 比佢笑死~~~XDDD

而家好鐘意叫我地睇佢。就做埋晒D古怪野 或者佢自創D招式~
總之好鐘意我地讚佢。佢做到D叻野就會好自信好開心~ 嘻~~

日頭已經唔使著片。不過去街我都比佢著學習褲。以防揾唔到廁所佢會瀨~
晚上就…未開始戒~ 哈~~
天寒地凍唔願起身。遲D先啦~~

2歲10個月。原本係可以返Preschool架喇。。
(呢邊 Pre = 香港K1 / Pre-K = K2 /  K =K3 )
政府只要求5歲時返一年K。就可以升小一
不過多數家長都比小朋友返多1-2年。節以出現左 Pre & Pre-K
由於咁岩到呔仔讀K既時候。政府改左入學資格。。
話要9月時足5歲先可以返K。。
呔仔 11月出世。變左要5歲10個月大先可以讀果年K (即幼稚園)。做大仔。。
所以佢入Preschool都可以遲一年。下年7月先開始都得~

細細1歲8個月大啦~ yeah~
高 32吋  重26磅半
唔知係咪呔仔好肉地。相比下去細細比較瘦。但原來佢都幾重磅喎~
可能佢身型高。所以望落唔肥掛~?﹗

呢隻細細。性格同哥哥相反。。
哥哥係比較怕事。沉實。審慎既人。。
而細就好大膽。同埋好唔理智~ 哈~~
我地叫佢做 "癲仔"~﹗真係好喪~~
最鐘意做D危險野。超級擒騎~﹗﹗
基本上全屋可以擒上去既位都比佢擒過架喇~~
超鐘意跳。係不停雙腳離地咁彈~﹗ 真係好精力~

佢好錫哥哥個喎~﹗
有咩都會即刻叫哥哥。同哥哥分享~
好似我比零食佢。佢拎左一塊。會猛話 "呔仔~ 呔仔~ "
即係叫我比多一塊佢拎去比哥哥~ 幾SWEET呀~~
哥哥就一粒糖都要咬左半粒先比細細。哈~~
(唔怪得咁豬潤 -_-)

叫細細學我地講野。講得好清楚。D音幾準~
而家講好多野架。雖然夾雜BB話。但好多都聽得明~
除左叫我地同"呔仔"之外。佢既新字有 :
woo 吱 = woody
呀卑 = com被
呀day = 飛機
阿保 = apple
D度 = 呢度
睇 / 食 / 蕉 / 係 / 波波 / 車 / 搣搣 / 打(比哥哥打果時識報寸 "呔仔打~~" XD)
麵包 / 奶奶 / Gummi / 豬豬…

比起哥哥。佢講野係快好多~
不過有兄弟係唔同既。同輩有得跟。學咩都快d架啦~

細細都好識扮野。如果哥哥喊。佢就會即刻扮喊。扮可憐。要埋黎嗲~
又爛玩。成日撩人玩。好鐘意拎走哥哥玩緊既野。激哥哥~
而家大個左。都同哥哥有得揮架。唔係次次比佢蝦~
不過哥哥都唔係次次出手。而家有時都會話我知。等我解決。。
(正所謂精人出口。笨人出手丫嘛~
又或者係成日我淨係睇到佢打細佬果PART。次次食死貓。唔著數喎﹗哈~)

細細而家有10隻牙。上4下6。。
早排出牙時真係絕食左成個月。餐餐一﹐兩啖 。。
而家又正常返。仲餐餐大大碗。我要努力谷肥佢~﹗哈~~
而家仲係飲緊盒裝奶。有卜友話豆奶好。都開始轉下豆奶比佢試~

呢個細細就遲過哥哥一年入學。2013年中先~
到時2個一齊讀。D學費甘喇~﹗﹗
相信到時都係我從山江湖既時候喇。哈~~

好喇。講住咁多先。諗到再補~
早抖喇~~