呔仔戒片記~
因為我家肥呔。成功戒片了~﹗﹗
<– 除左我地3個。呔仔自己都鼓掌~
果種興奮同"又過一關"既感覺。真係好難形容~
老實講。生左呔仔之後。我最害怕同覺得自己應付唔黎既…
第一樣係煮野比佢食。因為我真係從來唔入廚房的。。
(而家食到佢地肥肥白白。好唔好味唔知啦。我當自己好成功架喇~)
第二樣就係要戒片喇。。
由於全屋都係地毯。我覺得"由佢賴"呢招唔work。。
所以一定要等佢自己ready識講。識忍喇。先可以開始戒。。
2歲9個月既呔仔。咩都識。其實ready左一排架喇。。
不過佢一坐。細細就成日入黎攪亂檔。攪到佢無心機。坐兩坐就話要走~
可能又真係無得痾啦。佢唔會咁有心機坐到有得痾為止。。
變左如果要開始戒。我要成日的佢入去坐。。
唉~ 湊兩個。我連自己坐塔都無咩機會。又點有時間陪佢成日去坐丫~~
其實之前自己都有少少壓力。因為聽講小朋友24-36個月係最佳戒片期。。
因為佢地識表達。識講。膀光肌識忍尿。好多野配合就令到件事好快成功~
仲有3個月。呔仔就3歲。好怕佢過左時候會好難戒。。
有卜友媽媽話個小朋友寧願忍都唔痾。要著片先痾。。
所以一路心急。但又怕比壓力佢令佢怕左。。
又聽過好多媽媽話 "2歲-2歲半" 戒最prefect。唔使幾日就攪掂~
但我次次問呔仔。又呃又氹佢都唔想坐。又話想peep peep響片。。
都幾心急的。又覺得好難。。
點知~ 做起上黎。原來係一件幾容易既事。。
某程度上。同我怕煮野食一樣。開始左。原來唔係想像中咁難的。。
好啦。一齊黎回顧下呔仔既戒片過程啦~~
7月18日 – 見呔仔全日未poop 。抓緊時機。晚飯後氹佢去坐塔塔~
成功痾出第一篤屎﹗﹗
(記得好耐之前佢有響度痾過。但痾左落地下的。仲用手攪~ )
我開心到呢~~~~
之後一直唔肯再坐塔塔。話要痾落片片~
我就開始有D壓力比佢。因為覺得佢明明可以戒片。可以痾落塔塔。點解唔肯呢~~
之後果兩日軟硬兼施。又逼佢坐"屎監"。要佢痾左先可以出去玩。。
坐左個半鐘都無料到。仲嚇到佢一講要坐塔就抗拒。。
其實自己都唔開心的。。
諗諗下。不如遲下先戒啦。又唔係一定要而家既。等佢心理上ready先。。
諗通左。又Happy返~~
7月24日 – 好開心的呔仔。因為唔使坐塔都可以著底褲仔。同爸爸媽咪一樣~
7月30日 – 隔左一排無提。無啦啦口痕問呔仔想唔想去坐塔塔。佢竟然話OK~﹗
即刻陪佢去。今次要小心唔好嚇親佢。。
我講到明話坐一坐如果無就走喇。唔一定要痾到架。。
就係咁。佢好輕鬆地痾到尿呀。仲好開心咁自己倒同埋沖廁添~
見佢開如鐘意痾落塔塔。由果日開始。我就索性唔比片佢著。。
每隔1個鐘。就帶佢去一去。。
差不多次次去都痾到呀~ 真係好開心呀~~
7月31日 – 全日無著片。隔一陣就帶佢痾。同埋不停提佢。。
間唔中會痾濕底褲仔。濕左會自己同我講去Peep。。
我就同佢講。一有少少急就要出聲。唔係整濕褲褲先講。。
而Poop就一定會坐塔。呢樣就好易戒的。坐開一次兩次就唔想再痾落片架喇。。
佢開始明白個運作。有進步~
8月1日 – 見佢痾得幾定時。好勇咁拖左佢去附近超市買野。唔著片。。
行行下。佢話 "媽咪。呔仔peep左" 嚇死。望一望。濕左少少。。
即刻拖住佢衝呀~~~~~~~
一路話 "忍住呀。忍住呀~" 佢好緊張話 " OK~ OK~ " 好攪笑架~~
又真係忍到。入到廁所痾左好多呀~ 哈~~
呢次就係佢第一次"出街痾"喇~ 叻叻~~
8月2日 – 已經可以唔使隔一陣帶佢痾。佢自己識得急既時候話我知。。
幾爽呀~ 哇哈哈哈~~~~
日間。算係戒片成功啦~﹗YEAH~~~~
呢4日戒片記。就係呔仔"大個仔"既新開始了~
* * *
而家呔仔痾Peep企或坐都可以。我買左個Fisher Price既青蛙塔比佢。勁好坐呀﹗
之前果個唔掂啦。如果呔仔坐時開大又開細。噓噓係次次射出去的。。
男仔買塔。一定要買個前面擋得高的。就算有個笠都無用。都唔岩位既~
早前未係太忍得。所以響廳痾。。
不過呢個細細又攪攪震。而家哥哥慣左入廁所痾了~
細細又要坐。哥哥做咩佢都要跟住做。。
幾開心~
細細好鐘意坐呀。而家開大仲會自己嗌一聲先痾。有時間可以train埋佢了~
哥哥其實響廳痾都唔係咁自在。可能大個仔了。知道件事唔應該咁樣。。
其實咁樣痾好分心的。。
嘻~ 真係嘆~~~
細細渣杯手勢好得意。。
Joey。你話我個塔點可以擺響廳丫。細細直頭用手攪尿。。
媽媽係底褲狂。呔仔自然會有好多底褲仔。。
一早買左2-3T既佢唔岩著呀﹗條友仔個蘿柚勁肥大。要著4-5T喇~
辦緊大事。呵~~~
攪掂。而家開大唔使幫佢換片真係好鬼方便~ 哈~~~
午睡一醒。就識得話要去Peep Peep~
望咩咁入神??
爸爸﹗﹗唔好教到個仔同你一樣得唔得呢??
你就黎連痾篤尿都要睇住短片架喇﹗哼~~~﹗﹗﹗
可憐呔仔咁細個就被荼毒~﹗﹗
其實佢急就自然會痾出黎。唔使引既﹗OK~﹗﹗