無雷細 VS 好兄弟﹗﹗


今日呔仔響學校做左一件錯事。不過響講呢件事之前。
先講返之前一直話講細細無義氣果單野~
皆因響果單野發生後。我就係咁不停灌輸細細"好兄弟"意識~
而響果段時間之前。細細都係好錫哥哥的。
只係唔知點解有段時間佢突然咩都唔願意幫手。
其實都唔關對呔仔事。係佢果期咩都唔幫。咩都唔做。仲識推搪~
好似叫佢掉垃圾佢就會話累…
我相信佢係學左D 野。可能係我地都有咁講過唔為意。
佢就學左。皆因佢地呢D 年紀都好識運用佢見到日常既野~ XD
不過湊仔咁耐。都知小朋友係一期期。
呢期特別乖。可能下期又特別百厭。
呢期鐘意做呢樣。轉個頭又唔同了。
只係當見到佢唔對路。就要不停教。教返好佢為止 ^^

好喇。講返細細~
件事係咁既。話說呔仔咩都幫細細架。
細細比我地罰佢都會幫口。有咩事都即刻衝去幫忙。
都幾有大哥哥風範~
而細細其實一直都係好迷戀哥哥既。亦係一個好好既小幫手。
但果期無啦啦轉晒台。變左一個咩都唔幫手既小朋友 @@
果日去Target睇玩具。
哥哥響上面層架拎左盒好大盒。又比較重既玩具落黎睇~
拎落黎當然容易。到呔仔睇完想托返上去時。就唔夠力~
呢D 情況我一般都係推佢2兄弟互相幫忙。增進下佢2個既經歷咁啦~
點知叫細細幫哥哥。明明睇到哥哥比盒玩具責住左。
呔仔都叫佢救。佢竟然唔肯幫手。仲話自己睇緊玩具唔得閒﹗﹗
哼﹗﹗實在係太無義氣﹗﹗﹗
即刻比我捉上Shopping Cart訓話。無得睇玩具。
同埋專登開左包Pop-corn佢無份食。再加唔睬佢2個鐘。。
條友知衰喪喊。仲應承以後會做好幫手。同埋好好照顧哥哥添~

又唔知係佢知錯能改。定還是衰仔期過左?﹗
之後直到而家。佢真係守到佢既承諾。。
咩都幫手之外。仲好錫哥哥。咩都幫哥哥手。
野飲野食一定會話分比呔或者留番比呔。就算好鐘意既野都唔會自己食晒~
真係超錫哥哥呀﹗
朝朝一擘大眼第一句一定係 "媽咪。呔仔呢?" XD
"咪響你隔離囉~ @@"
之後佢笑得好甜架~ 哈~~~

好喇﹗到講今日喇。發生左件咩事呢…??
話說呔老師Ms Windy今個星期請假。
有個黎sub既Ms Jan。但佢唔識講中文~
接呔放學時。Ms. Jan就同我講Tyler今日打左一個同學仔既頭後面。
用拳頭打。同學仔喊得好犀利 @@
o下?﹗
我有無聽錯?? 呢舊豬潤都會打人??
Ms Jan話因為Tyler唔識講英文。所以問唔到佢發生咩事同點解咁做..
又話Tyler平時好calm好怕羞。而對方就比較Active~
我就諗。會唔會係人地玩玩下唔小心Hi到佢。
佢就以為人地打佢所以出手呢?﹗
基本上除左呢個原因佢好少會咁唔自控….
但我問呔時。佢又話人地無做過咩。佢都唔知點解會打左佢。
但又真係打左喎 @@
(o下? 打人無原因都得架咩??)
Ms Jan響度。見呔仔都驚驚地佢。
可能又唔熟啦。你知佢適應一個新人既時間係好耐。。
Ms Jan都無怪佢。始終小朋友既行為有時好難解釋。但係想知發生咩事。。

大庭廣眾。我一般都好比面佢地既。。
因為"公審"只會令佢覺得羞愧。同埋比咁多人聽到佢比阿媽鬧。
心理上有可能變成反叛。又或者老羞成怒。對件事都無咩幫助。
細路都要respect既。有咩事返屋企先拆啦 XD

好喇。返到屋企。慢慢問個究竟。。
你地知我都無咩火。發癲鬧就唔會喇。反而係好想知佢咩心態呢…
以佢性格。咁內向怕事。人地行埋去佢都閃開既。
無啦啦點會打人呢?﹗
問左好耐。佢都話"我係打左佢。唔知點解~"
心諗問落去都無咩結果。。
唯有轉陣。警誡佢打人既後果嚴重。千祈唔好再犯﹗

由於我地口中不嬲打人係要坐監。咁好自然今次呔仔就要坐監啦﹗
佢一聽到人地媽咪會報警。就已經好驚要坐監。
喊到收唔到口。。
我順勢開始同佢講。叫佢拎個袋執定自己D衫褲底褲。
記得早晚要刷牙。自己沖完涼快快手著衫唔好冷親。
記得媽咪教你既野。入到去好好照顧自己喇。
我地每星期可以黎探你一次。你有咩想要就同警察講….
(佢話想要簿同筆。畫畫~ 細細就話會帶超人玩具比哥哥 @@)
講到呢度我就聽到另一把喊聲。。
原來細細已經不停喊住嗌 "呔仔…呔仔呀……"
"呔仔…呔仔呀…..嗚嗚……."
問細細做咩喊。佢話 "唔捨得呔仔….我擔心呔仔……."

果刻好感動。我聽到眼都紅埋。感到細細真係好驚無左哥哥。。
之後佢不停喊。一直話擔心呔仔。。

呔仔當然驚到甩碌。好驚會比警察拉。憶憶下又爆喊。。

打人咁大件事。唔可以咁輕易放生佢﹗
嚇多佢一陣。等佢銘記於心。任何情況下都唔可以打人﹗

呢個就慘喇。哥哥被罰。佢有難同當。。
"好兄弟﹗唔一定幫到手。但一定會心痛你﹗要笑一齊笑。要喊一齊喊﹗"

講多2講呔仔坐監既生活。2個又喊。。

我同呔仔講。埋黎同媽咪影多幾張相。
平時見唔到你。我掛住你都可以拎出黎睇….
佢又喪喊…..

好慘呢。係咪呀?
講到我自己都想喊架……
但無辦法。細個更要嚴勵地教。。
唔係嚇佢。要比佢知道。打人係真係要坐監架﹗﹗

之後佢同我講。佢唔記得同同學仔Say Sorry~
(咁清醒既突然間 @@)
我就扮打電話。幫佢打去比警察問下咩情況。人地告唔告佢~
佢好緊張。我就話警察叔叔叫佢做一本Copy Book。
今次就原諒佢。但要寫得好靚﹗
佢開始放心。而佢隔離受左好耐苦既細細。
一聽到呔仔唔使坐監。即刻攬住呔開心笑~
我諗佢真係好驚無左哥哥 ^^

仲驚哥哥寫得樣衰要坐監。響隔離傍住晒 XDDD

有人竟然一邊寫一邊食左2個蛋撻﹗
喊左咁耐係肚餓D 既…….

眼淚都唔擦。努力寫﹗
幾快寫完成本呀﹗真係好驚比人拉……

件事算係告一段落~
聽日返學校佢話第一時間會同同學仔Say Sorry~

其實我留意到佢近來好多行為都係學叮噹。。
因為日日睇。而當我見到D唔好既野都會從旁指導。
叫佢唔好學。佢地咁樣係唔岩….
都有諗過唔比睇。但其實叮噹又無咩過份既野。
係技安成日蝦蝦霸霸。大雄又鐘意推卸責任同偷懶。
不過呢D呔仔睇到都會同我講話佢地唔岩~
而大家都成日互相幫忙。其實個個內心都係善良既~
同埋我鐘意叮噹既神奇野。對小朋友黎講好creative好多啟發﹗

好喇。頭先做咩呢……
當我地又睇緊叮噹"鐵人"時。我見到有個畫面係技安一野打落大雄個頭後面。。
我望住佢。佢望住我….
"你唔係呀嘛?﹗"
"係呀。就係咁囉……"
@@ 唉。好明顯佢未識分卡通同現實。卡通係打不死架仔…..
佢應該以為咁樣係當玩。又走去試下。點知瀨左野。又唔識點同人講….

完 @@

還有好多我們家的最新動態在FB專頁上唷!歡迎點Like加入大家庭! »