西方購物文化。。

其實係之前睇到上篇卜。有個卜友留言。。
令我知道。。
原來好多人都唔了解。又或者講係唔知道。美國呢邊"購物文化"~﹗﹗
咁當然。我知道佢係無惡意既。應該係真係唔清楚所以會咁樣講。。
不過我睇佢個留言時。仲以為片中我地玩得好過份添﹗
(因為片係weak7擺。我都未睇過的~)
即刻睇下自己做過D咩。人地會咁講既?﹗
睇完後~~~ @@
除左細細一直踢住個波。呔仔一直渣住條恐龍咬爸爸之外。。
就係推過幾下車仔。同埋篤過幾下支伸縮劍。。
哇~ 嚇到我丫。仲以影到D咩咁大劑~~~

不過講真。美國同香港既"購物文化"。真係完全兩回事。。
首先﹗有卜友都講左喇。呢邊基本上無論你買咩。都有90日full refund。。
係完全唔會 (亦無權)問你點解要退貨。。
有好幾間公司。仲係life-time退貨。。
即係你著完對舊波鞋。幾時都可以拎去退錢。。
甚至乎你食剩半條麵包。半包菜。都可以退款~﹗﹗

唔好話去間舖頭。狂玩狂試。之後拍拍蘿柚走人。。
大把人買返屋企用完幾個月。之後拎去退都係咁啦~
呢D真係要睇人自唔自律。同埋有無咁好閒情成日走去又買又退。。
以前讀大學D同學無錢。幾個人夾份租間屋。。
部電視機每3個月退一次。唔好以為中國人鐘意拎著數會咁。鬼黎架﹗
哇~~ 講到退野。D鬼狼好多。我覺得我地中國人算好內儉架喇~
(如果呢D Policy響中國我唔敢包啦)

我見過既奇境 : 半袋麵包。幾十件衫。一盆花。幾個生果。爛鞋。爛喼..(太多了)

另外一樣好唔同既。就係無人會好似寃鬼咁吊住你。。
又或者猛叫你"睇岩埋鏡拼拼"
衫褲鞋襪任試。唔好話無人跟你。好多時係調返轉頭我想揾個人幫下都無。。
要等好耐。呢個叫果個。果個又叫另一個。。
基本上。成間野都無人會望你無人會理你。自由到爆~~
 
哇~ 同香港就大分別喇。。
我唔知仲有無"唔買黑面"呢D sales啦~
但"摸蝕"呢樣野就一定有囉~﹗﹗
哈~ 最好你入到黎。即刻拎住大大舊錢。買買買。。
否則望多幾眼仲唔買就係"阻住做生意"。"唔買就唔好摸蝕晒~﹗﹗"

所以我好明白點解有卜友會對我地響反斗城玩玩具會咁大反應。。
文化差別太大喇。。
其實果日咁岩無咩人。平時我地去。係會見到好多小朋友瘋狂咁樣玩玩具。。
有人踏單車。有人拎住剷泥車四圍推。有人拎書睇。有人玩呼拉圈。。
呢個就係美國人既模式。I LOVE FREEDOM~
相比起瘋狂既細路。呔仔同細細可以話係好斯文。。
而我同weak7跟響佢地後面。亦會跟手擺返好佢地拎黎玩既玩具。。

不過。最後講到身教呢D野。。
每個人都有自己教仔女既方式。其他人其實不應評論。。
(即使你好擔心呔仔細細第時大個會變成壞人。唔使怕。我可以話你知。。
佢阿媽我細個考試成日出貓。佢地應該好人有限。唔好咁大期望~)