號外 : 細細終極戒人奶

日期: 2011年02月13日下午05:55｜回應: 無回應｜瀏覽數

埋身餵人奶。對我黎講。係一件好好好快樂既事。。

打從呔仔出世第一日。我就開始左"奶媽"呢條路。。
如果要比我"奶媽分"自己。我真係會比自己100分架﹗哈~
剛剛出世既BB。每次啜一個鐘。啜到訓著喇。。
但唔夠5分鐘個頭又擰口擘擘。揾食。又啜一個鐘。。
睇返當日呔仔既記錄(細細就無寫喇。熟晒手啦嘛~)。。
試過由夜晚7點啜到半夜3點。其間停過十零分鐘。。
當日就係抱住。"個仔食得多就吸收得多"既心態。幾攰都撐落去。。
好多人話我點解咁好奶。餵極都仲有。。
其實真係要付出架。一開始頭幾個月係不停餵。。
真係預左24小時佢一想食就比佢食。。
如果一開始餵得好密。之後就長餵長有架喇~
同埋灌湯灌水。飲到個肚就黎爆。就會有好多奶。。
(連飯都無咩位食。個人咪會瘦囉~)

餵人奶。媽媽係辛苦既。爸爸係舒服既。。
咁我無理由自己醒左餵奶。換片會專登叫醒老公掛?﹗
變左餵奶同換片呢兩項大重工程。都係我一手包辦。。
如果你個BB係人奶B。你就會明白"換片"絕對係一件苦差。。
人奶有輕瀉作用。BB一晚可以痾你10篤8篤。。
仲要好多時係fatt晒上腰。要善後。。
當你換完一次。唔夠10分鐘。又痾左

weak7好幸福呀。生左兩個仔。從來半夜都唔需要起身餵奶/暗仔訓既。。
(真係未聽過囉~ 呵~~)
加上佢返晨早7點。我盡可能都唔比BB喊。嘈醒爸爸架。。
又係"人奶"既功勞啦。一啜。BB即刻甜甜入睡。好爽~﹗

呔仔6個月大時。就有左細細。。
餵到呔仔9個月大。迫不得已都要戒喇。因為餵人奶子宮會收縮。怕影響細細。。
呔仔就叻喇﹗一轉就肯飲奶粉。一D都唔留戀媽媽奶。。
(當時都幾hurt架﹗哈~)
果時有留言話呔仔順灘。好叻咁易戒。都唔覺係咁利害。。
但呢次幫細細戒。就知道原來哥哥真係好叻。好乖~

細細又係一出世。全人奶埋身食到1歲。。

老實講。細細9個半月大時。。
第一次咬損左我。當時我係好唔捨得。好唔想幫佢戒人奶既。。
可能係太突然喇。我無心理準備要失去同細細呢個溫馨時光。。
好似失戀咁慘。。
最後又比我捱過左。好番可以繼續餵。。
不過2個月後。出埋上門牙。又損番。仲大鑊好多。出水流血。。
呢次都決心幫佢戒架喇。。
開始轉下佢用杯飲奶粉。點知佢堅決拒絕~﹗﹗(好硬頸)
一見到奶就推開。發爛。爬上我身上揾奶食。喪喊。。
實在太太太…..陰功喇~~
試過牛奶佢敏感。唔同牌子奶粉又唔肯。吸管杯鴨咀杯。連奶樽都試過。。
無得食人奶。情願咩都唔飲。攪到無pee pee又痾粒粒屎。。
心痛到我呢~ 佢從來未試過痾硬屎架﹗d屎好靚架嘛~﹗﹗
心軟。又忍痛比佢啜。。
好多次。餵緊細細。痛到我響房一邊呻吟。一邊流眼淚。。
唉。可能係因為咁既情緒。我都呢排都無谷奶喇。。
細細啜都仲係會有得食。但身體已經唔可以再餵。所以唔谷喇。。

咁既情況都纏繞左個幾月。呢幾日真係痛到不能再忍。。
(我自問都好忍得痛)
好多次佢一啜。我就痛到扯返佢出黎。佢就大喊。有時又喊到訓著左。。
食少左好多奶呀。不過就食多左好多飯。都算係好事黎既~
呢幾日早午由佢食飯飲水。到臨訓先比佢啜。。
全日又間唔中比幾啖奶粉佢飲。轉轉下。希望佢轉到啦~﹗

點知。今日奇蹟出現啦~~~~﹗﹗
原來呢個世界真係有奇蹟架。真係好鐘意我既人生。幾時都係咁surprise~﹗
細細無啦啦肯飲奶。係哥哥平時帶出街飲既紙包奶呀。。
諗住比佢啜幾啖。佢竟然自己渣住啜晒成包呀。。
我地開心到無法形容。。
因為weak7都好心痛我。要忍痛餵佢。成日聽到我低吟 -__-"
細細竟然肯飲﹗隨一陣再開多包比佢。仲清埋添~﹗﹗
哇哈哈哈~~~~ 我甩難啦~~~~~~~~~