呔仔哮喘…?!

日期: 2013年03月30日上午09:00｜回應: 無回應｜瀏覽數

3月29日。仲有3日終於捱過左人生中最黑仔既3月﹗
你地都知我不嬲好少報憂。最好無咩憂好報啦 @@
哇﹗真係咁大個囡都未試過咁黑仔。一單接一單。唔停個喎﹗

由月頭開始不停破財。次次1千幾百。都算喇…
3月中果日同呔細踩完單車。無啦啦夜晚開始咳。仲發燒~
堅係無啦啦。完全唔知咩事。
見佢咳到成晚瞓唔到。第朝即刻同佢睇醫生。
醫生聽完佢個肺。已經話覺得咁既咳聲係哮喘 @@
o下? 咁大鑊???
一時間真係接受唔到….
同佢去攞藥既時候。佢響購物車坐坐下就瞓左。超病果種昏睡。。
我個心痛到。忍唔住哭了。因為一直同呔一齊。唔想佢見到我喊嚇親佢。一直死忍~
之後就慘喇。行行下街一諗起又想喊。沖涼又喊。攬住瞓左既佢又喊….
果晚食完醫生開既藥。好返少少。但都係間中咳。瞓唔到。。
隔左一日又燒返。喪咳仲嚴重氣喘。醫生話食左果D藥應該唔會再燒。
驚佢有其他大鑊野。即刻寫紙去照肺@@
好彩即時結果只係肺炎。但就確診佢有哮喘~
當我聽到既時候。我好無知咁問左醫生一個問題。佢會唔會死架??
好驚呀。真係好驚無左呔仔呀。嗚~~~T_T"

由於已經幾晚瞓唔到。加上一直氣喘。醫生最後決定幫佢打左支好勁既消炎針。
話腦膜炎都係打呢支@@
當然。打完之後真係食左仙丹咁。條氣終於順返。終於有覺好瞓。。
但其實係人都知。消炎藥對小朋友唔好。仲要咁強勁。唉~
(另外仲食緊10日消炎藥)

就係呢張相。果日PO Facebook。感觸平時唔會留意既小事。
原來可以安安樂樂咁瞓一覺。已經係好幸福既事~
呔仔又帶智慧比我 ^^
多謝好多好朋友關心。仲有哮喘朋友給力﹗
個人先開始放鬆D。無咁灰。明白只要小心護理。其實哮喘唔係咁大件事~

由於哮喘既人對塵蟎好感敏 (其實好多野都可以引發哮喘)。
當機立斷。爸爸即刻拆左全屋地毯。。
其實細細有濕疹果時好多卜友都話拆地毯架喇。不過之後佢好返。又無再理~

而我亦聽好朋友提議。將床褥枕頭用膠包左。佢細囡哮喘。包左真有改善。。
最正係。佢Show比我睇佢點包法。果張公仔膠台布….我見到張相好開心~
開心既唔只係張野太娘。而係當有問題時。有個人幫你諗辦法。
陪你一齊走過低潮。不停幫你打氣﹗
友情。就係咁樣一點一滴建立 ^^

朋友仔的"開心Share" XDDD

我響Target買的膠床笠。有zipper成張床褥包實的 ^^

P.S. 我話左下次返香港時買幾pack過佢嘆下。等佢唔使再咁娘 XD

好返後。醫生仲幫呔仔plan左個哮喘療程~
除左平時運動前要吸2下Albuterol放鬆氣管之外。
每日早晚都要用打霧機聞氣。聞足3個月~
呢隻Budesonide藥水有類固醇成份。不過吸入性類固醇無side effect。可以放心吸~
每次一小支。聞大約15分鐘左右就攪掂。都幾快。呔都習慣了~

如常活動 XD