呔仔1歲7個月。細佬4個月大

日期: 2010年06月02日上午09:52｜回應: 無回應｜

話咁快。又一個月。。
寫卜好。好多時睇返以前呔仔細細個。心情仍然興奮。。
雖然而家都仲係好細。但好快好快。過多年半就返學架喇~ 哈~~

睇書講。男仔BB講野係比女仔遲。女仔語言天份較高。。
但男仔觸覺就比較敏銳。比較留意身邊既事物。較好奇。。

1歲7個月既呔仔 (約27磅。30吋高) 。識聽好多野。識講好少野。。
開始會回應 "好"。"係"。"知" 等單字。。
最叻係"一揚指"。指呢樣指果樣。。

叫人就成日唔肯。個個都係叫"媽媽"。。
無辦法。日日對住我。。
前兩日weak7先講。話除左去醫院生細佬之外。呔仔都無離開過我身邊。。
我慶幸。我有機會每日陪住佢地成長。。

呔仔每日都好多新奇事。。
前兩日攞佢個potty擺廁所。佢竟然自己扮坐。之後手指指本雜誌。。
打開黎睇。之後就拎廁紙。自己擦啫啫。之後仲沖廁~﹗﹗
仲要真沖 (一向都唔夠力沖架嘛﹗)
哇~~~ 睇到我眼都突埋。笑左好耐。即時打比weak7話佢知。。

今朝又攪笑。自己起身。落床。走去unplug左盞夜燈仔。。
再插返個安全蓋落插頭度~﹗﹗
"哇~~~ 大佬呀﹗個安全蓋係防止你攪電電架﹗
咁你自己攪掂晒得啦。我地仲使咩攪咁多野呀~ "

大個仔喇。醒左唔再淨係坐響床嗌。會自己落床衝出房揾我地。。
不過衝出黎。仍然係十分驚慌既樣子。好似走難咁。。
最耐人尋味既係。多數衝出黎時。手上會拎住d 野。。
可能係玩具。又或者一支lotion。。
有次仲用個畫板。好小心但又行得好快咁兜住woody公仔喊住出黎。。
笑到我地碌地~~
問題係。點解響咁慌張既情況下。仲有時間"lap"野呢?
同埋點解一定要"lap"野呢??

呢d只係其中二三事。仲有好多攪笑野。對住佢真係好鬼歡樂~~

食野方面。胃口一時時。有時可以一餐食兩餐份量。。
有時可以一啖都唔食。但每餐就一定清晒d 菜 & 生果。。
奶就早午晚三餐。果菜汁。麥精。寶礦力都係佢至愛。。
好攪笑架。一見我拎d佢鐘意既零食出黎。就會四萬咁口。笑定先~﹗
好似一定係比佢咁~~
好少比甜野佢食。佢又唔係太好甜。反而鐘意咸野多d ~~
好似餅乾條。雜菜條等。。

每次出街食飯。我都會準備好呔仔全餐。。
主餐。菜。生果。飲品。零食
我唔可以講話自己好稱職。只係希望有餐安樂茶飯食o下~
當呔仔食完大大小小。嘆埋杯juice。時間應該足夠我地食完一餐。。
起碼唔使佢無無聊聊。扭呢樣扭果樣。。
主餐有時都會食街外野。例如烏冬。意粉等。。

* * *

到細佬啦~ 4個月。好耐無上磅了~

濕疹大家都唔好再問喇。時好時壞。唔斷尾既。。
琴晚又發。我諗係我食左炒蛋 -___-""

爛玩升級。自己無啦啦都可以笑一餐。。
平日活動多數係聽音樂。食手。抓玩具。等人同佢玩。。
望手都可以望好耐。又食下咁啦。。
仍然係自己暗自己訓。不過如果抱開。就扭抱。。
唔開個頭。可以成日唔抱佢都唔嘈。。
扭下唔得逞。又訓返。。

開始鐘意坐直抱。四圍望。又或者企。一企又會猛咁跳。。
腳力腰力都好好。。
今朝比佢自己坐。無野靠。竟然坐到一陣唔摺埋呀。。

超鐘意聽我唱歌。唱咩佢都興奮。都叫一餐。。
總之係望住佢。佢見你笑佢就笑架啦~~
咁識氹人。真係錫到佢燶呀~~

食奶方面。3-4個鐘一次埋身餵人奶。。
有時出左街。可以5個鐘先食。。

一到夜晚就痴我。一定要我。個個抱都唔得。喊得好淒涼架~~
所以暗呔仔訓就要夾岩時間。。
不過好多時。都係暗暗下呔就聽到細佬響出面喊。此時爸爸會入黎接手。。
間唔中呔仔出牙或扭計時。又會聽到呔仔響房入面喊。揾媽媽。。
我安撫細佬後。又會再入房暗呔仔訓。。
攪攪下。9點幾變左11點幾。每晚就係咁樣過。。