生細佬B回顧。。


兩隻仔訓晏覺。我又偷到少少時間。一邊食野一邊寫卜。。

細佬車仔。轉眼間已經三個禮拜大啦~﹗
係時候寫下果晚發生左咩事。趁我仲記得。。

1-25-2010 星期一 (生細佬前一日) 
第一次假陣痛。應該係凌晨 4點幾。。
叫醒左weak7。話可能生得。。
點知又無再痛喇。。

果日老公請左假。因為覺得隨時生得。。
加上半夜比我摷醒左。又嚇一嚇。好累 (咁既藉口都有?? )。。

1-26-2010 星期二
我心知呢晚會再黎。應該都係呢日架喇。。
點解??
因為生呔仔果時。又係前一晚開始陣痛。第二晚同樣時間又痛。就去生喇﹗﹗
果然不出我所料。凌晨 4點09分。又開始痛。。
今次。係真架喇。幾分鐘痛一次。每次痛30秒左右啦~~
 Yeah~~~~!!    我超期待細佬B出現呀~~
不過我無即時叫醒weak7。費事好似琴晚咁。睇定D先。。

一個鐘頭過去。都係有痛。清晨5點鐘。我叫醒佢喇~﹗
條友好似上左身咁。一聽到即刻彈起身。個樣勁精神。。
然後忙於執執執。執佢D相機。手提電腦。卡呀………………
我就無咩要拎。醫院咩都有。帶個人去得架喇~~

一路上。未天光既感覺真係好好。好爽 (雖然愈痛愈勁) 。。
因為好似以前天矇光。出發去滑雪咁。。

差不多6點。去到醫院check-in。。
之後比姑娘check。開左5度喇。推上產房~~
過程同生呔仔一樣。不過今次唔使上樓上行行行。可以就咁灘響度等。。

個姑娘問我要唔要打 "無痛分娩"。我地話唔用喇。。
佢又介紹另一隻輕微止痛。係令我肌肉放鬆。打左1個鐘左右就會散。。
咁都好。可以減輕陣痛。又試試啦~~
打完之後。即上腦。好似比人迷暈一樣。個天花板係咁轉。。
不過又真係唔痛喇噃。。
到9點左右。我個OB醫生黎睇我。睇我開成點。。
一下check之下。仲係5-6度。。
都話用藥唔係好事。無知覺。真係開得好慢。。
見無咩進展。醫生話不如我而家幫你穿羊水。咁就會開得好快。好快生架喇﹗
咁都好。我好同意。。

點知佢下一句就話 : "你真係唔打"無痛"?? 我而家整穿你。你無藥係好痛架﹗
到時穿左。你想打就未必趕得切架喇~﹗我比少少時間你諗。。"

我同weak7對望。比佢拋一拋。個心都離一離。。
點呢? 點好呢??
老公最後決定 :  "唔好辛苦自己喇。打啦~﹗﹗"
我知佢驚我好似上次咁辛苦。。

好啦。又信多你一次。。
呢次。無信錯人喇~~ 我終於成功體驗到 "無痛分娩" 威力﹗﹗
陣痛。原來真係可以一D 感覺都無。好正呀﹗﹗
不過我又要捱兩針。個麻醉師第一針係拮唔岩位既 -______-"" XYZ@#

還有好多我們家的最新動態在FB專頁上唷!歡迎點Like加入大家庭! »