鐵頭功。爆電視﹗﹗﹗
10月24號傍晚6時正。發生左呔細咁大個仔以來犯得最嚴重既一件事~
就係呔仔用個頭憾爆左部電視機﹗﹗ @@
事發經過係咁樣….
當時我坐響梳化既。佢地就玩緊。玩玩下就行埋左部電視~
我無咩留意啦。無啦啦就聽到2下”未聽過既聲”。同佢地平時拍電視係唔同~
無錯。已經話過佢地好多次。唔可以拍電視。講左佢爆。會受傷。。
其實係講到口水都乾了@@
只可以話佢地正值”多手”時期。真係好鐘意以身試法﹗
你愈話唔好。佢地就愈要試下點樣唔好法﹗
所以好多時我係由佢地受下傷。先知點解會唔好 (當然唔係嚴重野﹗)
細細醒D架。咩都細細力試下先。古惑到死~
大肥佬就豬頭柄黎既。人地細細力。佢就出盡力 @@
睇怕第時都係比人推出去發言。之後自己瀨野果渣…..好啦。講埋先。之後聽到聲。我就望過去啦~
就見到呔仔個樣呆左。跟住就好慌張同我講部電視花左 (佢知識上呢D係叫花~)
我望一望。今次仆街喇… (請原諒我粗俗左。呢個係我即時反應 XD)
我問佢隻手痛唔痛。佢話唔痛~
我當時係唔知佢用個頭黎憾。佢又無講。係之後爸爸問佢點發生。我先知係鐵頭功﹗
好喇。講下當時我既反應。我係同佢一樣。驚佢比爸爸鬧 XDDD
第1當我知道佢無受傷時。已經係放心晒~
第2我知道佢並唔係有心咁做。我唔係保佢。而係佢既性格根本唔會~
佢連食緊隻雞脾。擺低佢唔食住。都要用張紙巾包住佢保護佢。
叫佢唔使驚。呔仔一陣會返黎~XD
佢係唔會專登去破壞一樣野。佢最怕見到慘事….
所以打爆電視我根本係無怪過佢~
我明白小朋友。有時係不受控制。fing手fing腳係平常事。我知要教。
所以正常情況下佢唔做。我已當係教好左佢~
而平時佢細細力拍左電視。會即刻望住我講sorry。証明佢係有意識咁樣係錯﹗小朋友一玩就會創。控制唔到自己。果刻亦唔會諗到後果嚴重~
即使平時點教點講。唔做錯過係唔知咁大鑊~
當然。我同意一定要重罰。等佢地記得呢件事係嚴重﹗
當我知道佢打爆左部電視之後。個心忍唔住笑…
即刻諗起細個一首打油詩 : XXX跌落地。慘玻璃。返到屋企唔憤氣。一搥打爛電視機…
哇﹗4歲打爆電視呀﹗幾經典呀。真係可以講成世~
大個講返勁好笑 XD
(當然如果佢係發脾氣。專登打爆就笑唔出啦﹗)
但我又唔可以比佢覺得係無事。變左我就要做反應喇。要反應到好大﹗
咁唔知係咪我個反應大得滯。嚇到呔仔成個人震晒。係見到佢個樣變到面色慘白。
表情開始不能自控。成個人硬晒…
哇﹗果刻我幾驚佢心臟負荷唔到會死呀﹗﹗
我無鬧佢喎。只係我既反應比佢知道今次係好大鑊…
我見狀。梗係即刻攬返佢。定返佢神先啦~
之後一齊商量。諗辦法補救。。
佢一開始都有話不如鎖門。唔好比爸爸入屋見到。。
我當然即刻糾正佢。做錯事唔可以逃避。逃避左你唔會安樂。
一定要面對。最多比人罰。但罰完下次唔再做就會原諒。咁先係正確﹗
佢都好受教。之後話會揾錢買過部電視比爸爸。但話自己係小朋友又唔識渣車。
或者用吊機車吊部電視返黎 (開始自我陶醉 XDDD)
我都知今次佢死梗架喇。即刻FB爸爸先﹗唔係返到黎先見到仲大鑊….
呔仔比我責備完。知道爸爸返黎一定好嬲。佢好眼瞓都唔敢瞓。
話要等爸爸返黎鬧佢喎~ (係呀。佢係錯就認。打就企定架﹗)
不過5秒後就頂唔順瞓左 XD
但你唔好以為佢吹水喎﹗
真係爸爸一開門。佢聽到鎖匙聲即刻成個彈起身。好慌張咁走去爸爸面前認錯﹗
真係講得出做得到架﹗呢樣我好欣賞佢。唔會扮瞓逃避。
亦証明佢對呢件事係好擔心 & 好內疚 & 好驚…..
爸爸話知道佢嚇到慌晒。驚佢頂唔順。都無打算喪鬧。但就點都要令佢記得今次既事~
所以返黎後。就叫佢執野走喇。唔可以再留響呢個屋企。
因佢唔珍惜愛錫屋企既野~ 之前推車已經撞穿牆~
呔仔既性格係講道理。咁樣佢會更加知道自己做錯左。會自責同內疚~
佢聽到後就喪喊了….
喊完心情平復左少少。爸爸開始同佢講道理。教佢問佢好多野。令佢知道今次係好錯~
喂﹗2奶果邊話”死等唔瞓”班瘋狂卜友。你地睇住咁多先﹗
我去接呔呀。轉頭再Post埋~ 拜拜~~