呔仔 4 個月。。

時間都過得好快。呢4個月呔仔又變得好快~~
我都變得好快~~

呢17個星期。呔仔每日都學識一D野。。
未生BB之前。我地唔知道。原來一個生命可以咁奇妙。。
唔使教。時間一到。自動識 (當然教就識快D)。。

打呢篇卜。我一直頭皮發麻。好想喊~~
因為諗起初生呔仔。見到佢。由咩都唔識。到而家識好多野。。

由 6磅 6 /18吋長。到16磅 /25吋長。。

由個零鐘食一次奶。到兩個零。到三個零。到而家四個零。。
由晚晚抱住訓。到抱住訓著先放低。到可以自己訓。。
由擦身。到落盆沖涼。到用花灑沖涼。。
由只識舉高手臂。到識轉拳頭。到精活控制手指。。
由食手背。到成隻食。最後齋啜手指公。。
由直望天花板。到轉頭望左右。到爬爬向前望。到坐住向前望。。

由只係摸到佢自己塊面。到左手摸右手。到而家摸到腳趾。。

由假笑。到真笑。到笑到卡卡聲。。
由 heehee聲。到講Un-Ku。到而家好嘈喇。猛撩人傾計。興奮時又會尖叫。。

實在太多太多成長。太多太多變化。。
今朝起身望住佢面圓圓。佢對住我笑。我又攬住佢笑。。
突然。佢舉高手摸我塊面呀~
小手掌好暖好暖呀~~﹗﹗
唔知點解我即時諗起weak7。因為佢都會咁樣摸我塊面。。
我突然好感激佢兩父子帶比我既幸福。。

祝所有我愛既人。愛我既人。健康快樂~﹗﹗
呔仔 要快高長大呀~﹗