呔仔終於開學啦﹗﹗

日期: 2012年09月10日下午02:18｜回應: 無回應｜瀏覽數

2012年9月7日
3歲零10個月既肥呔。終於獨自上學去~

本來係9月4正式開學的。但一直仲咳同鼻涕。。
我日日都好擔心。呔仔病左返唔到學我確係有D壓力。。
成日口up up話呔仔又返唔到。講到7話我煩。。
唉呀﹗我原本唔係咁架。真係天跌落黎當被com果D人。。
唔知做咩做左阿媽後。我真係"阿媽"左 @@
我知道呔仔愈遲開學。對佢黎講係愈困難。。
唔係進度。呢邊K1無咩野教。
係佢心理上。我怕佢對學校生疏左。一開始就要自己返會唔慣。。
上星期本身可以陪佢返5日學。然後今個星期正式開學佢應該OK~
但上星期病。只陪佢返左3日。。
仲要果3日係sub teacher。變左今日果個老師佢係完全未見過 @@

見佢琴日無咩事。預備今日比佢返學。。
已經成日提住佢要自己返學。佢當然話唔想返。
但都會答我"知道。會聽老師話…"
呔仔除左正義/樂天/善良之外。唔知你地有無發現。其實佢好慢熱。。
佢好抗拒同陌生人接觸。唔鐘意比人摸比人拖。。
好似上星期返學。老師用手指公仔講故事。之後用公仔逐個同學摸面逗佢地。
個個都笑得好開心。係得呔仔嬲嬲地。唔多likey~
咁我唔會夾硬迫佢鐘意既。但會解釋佢知老師係只想氹佢開心。
如果佢唔鐘意下次可以同老師講~
古怪呔仲有好多騎呢野。好有型架﹗﹗
基本上所有你覺得小朋友會開心既野。佢多數唔鐘意。。
(而細細性格係同哥哥完全相反 XD)
成班同學響公園玩。佢完全唔玩。一個人踎響地下用2隻手挖泥。係徒手喎﹗
老師見到問我。我話係呀﹗佢係鐘意咁樣玩 XDDD
我覺得佢好型架﹗仲有個同學仔跟住佢 (估唔到大佬呔咁快有o靚﹗)
結果2個一齊挖泥 XD
(挖挖下仲無啦啦大嗌 " 我真係好鐘意媽咪呀﹗" D老師個個望住我笑)
返學係學群體生活。上堂/開餐當然要合群排排坐。
但Play Time我覺得佢可以自己話事 ^^

好多朋友都話。第一次見到呔細。一定係比細細吸引過去。
因為細細好熱情。好快就同你玩到癲晒~
但呔仔既反應一般係唔多so你。連你走去示好摸下佢。佢都唔鐘意。
不過朋友所言。如果識落呔仔。慢慢就會發現佢真係好乖。好多優點。
之後你會愛上呢個小朋友既善良同埋佢既真性情~
至於細細。由於佢係靠樣揾食。同埋勁攪笑。真你氹得你好開心。
所以你會好縱佢因你已經迷惑左 XDDD

講返今日先~
話說琴既臨瞓前又渡佢。講左今日要自己返學。會點點點咁~
今朝7點9鬧鐘響。佢起身。知道要返學。開始怪異。。
問我 "今日係咪要自己返學啦?"
我話 "係呀。不過媽咪好快又接番你之嘛~"
之後佢就開始喊。唔肯起身。。

哩埋比我揭開。幾唔老黎 XD

之後一路換衫一路喊。喊到出門口。。

"唉呀。哥哥做咩事喊架?" @@

心諗 : "唉~ 唔通真係避唔過?"

"呔呀﹗媽咪叫我地笑呀~"

"笑下啦笑下啦﹗E~~~"
"又唔係你返學。你梗係笑得出啦﹗"

"我勁驚呀細佬﹗﹗"
"都唔知你驚咩?﹗"

"我驚媽咪走左去囉﹗嗚~~~~~"

出發啦﹗呔仔呆晒。梗係好擔心喇。陰功…
本身我都無咩時間不捨。因為都幾趕住出門。。
渣渣下車。。
無啦啦呔仔問我 "媽咪你一陣係咪會走架?"
我話 "係呀。你今日要自己返架。不過我好快會接你放學既~"
佢話 "如果你走左去。我一定會即刻跑返屋企揾你架﹗﹗"
我聽完。眼濕濕。。

到學校。見我無走。呔仔心情又輕鬆左。。

細細玩"飄" XDDD

"飄浮細"

"媽咪陪入課室。都無咁驚~"

個個老師都話細細ready返學。佢入到去已經自動埋位~ XD

知道媽咪要走。開始扯住我唔放。好慘呀﹗我好想喊….

眼見幾個小朋友都喊晒比人掟入黎。老師拖住佢地。父母即閃。。
其實咁樣真係唔好。返學啫。做咩攪到拋棄咁。。
走左都唔安樂。呔仔又會好不安。。
加上佢好抗拒老師捉住佢。個頭開得唔好既話。佢以後會唔鐘意老師。。
既然呔仔未習慣。我就陪多佢一陣。佢OK我先走~
跟佢上堂。佢一路擰轉頭check住我。。
我話我唔會走既。走一定會講。佢又放心D。。