相處之道。。
"你倆總俾人覺得…相處好開心, 好快樂, 好螎合 !!!
究竟, 有冇試過嘈交, 炒大鑊呢 ?"
"求知慾好強"既網友No Doubt今日問左我呢個問題。。
我就響度諗。我同weak7幾時嘈過交呢~~???
答案就係。。開始拍拖既第一個禮拜左右。我地嗌過一次交。。
然後直到而家。都無話嘈過交了。仲一日比一日珍惜大家。。
究竟點解會咁呢?? 其實我都好想知。。
不如講下我地兩個人既性格同相處之道。。
等我自己第時愈變愈野蠻。都記得以前係點。有得跟返。。
我同老公都係好怕麻煩既人。都唔鐘意嘈交。講野大聲。或者黑面。。
我地好明白"己所不欲。勿施於人"呢個道理。拍拖時做所有野前。
諗一諗如果受既係自己。又會唔會開心呢~~???
就係咁。我地拍拖都好尊重對方。。
明白要得到一段好關係。就要放棄花花世界。。
花花世界。曖曖昧昧。當然過癮。但明知會失去對方。又係咪值得呢??
我地初時拍拖。為左呢D花花野嘈過一次。之後。。
我地就連Friendster都兜走埋。幾百個朋友全部揾唔番。都係好既。。
係直至大家感情穩定左。先開始揾返D異性朋友。仲要係無傷害性果隻﹗
即係女仔呢。就唔淮靚女既。把聲又唔好姣既。又要有男朋友既。。
男仔呢。就細過我既。唔靚仔既。唔大隻既。又要有女朋友既。。
哈哈哈~~~~~~ 係喇係喇。即係好安全果D呢~~~~~~
再講。老公未做呢份工之前。我都好辛苦下架﹗﹗
果時佢讀返書。我就一路讀Full-time。又打兩份工。。
不過算佢啦。一返呢份工就叫我唔好再做part-time喇。淨係讀書啦~~
所以而家先咁嘆咋~~ 哈哈~~ 都有D苦盡甘來。雖然唔係苦左好耐。。
其實兩公婆相處。真係要互相遷就~~ 要知道對方脾性。唔好挑戰佢既極限﹗﹗
哈哈~~ 其實我係一個好易喊既人。只要佢大聲少少或者話下我。我就會喊~~
不過佢次次都當我扮喊。之後整色整水。扮鬼扮馬。痴晒線~~(真係勁好笑架﹗)
我地平時就係咁。一發現對方嬲嬲地。就會不斷整色整水。。
不過講真。咁耐以黎都無嘈交。算係幾神奇。。
可能我比較樂觀。咩都無所謂。唔擔心。。
佢就相反。咩都做好準備。所以變左好似好細心咁囉~~
解答左你既疑問未呀No Doubt。。?
以下係一張我喊既相。上個禮拜喇。老公問我幾時做野。我咪喊囉。。
我仲話要搬走呀﹗佢就問我係咪搬落樓下個花糟度。係既。佢聽日落黎探我﹗
我係咪好淒涼呢~~ 我一諗起老公要我做野。我好傷心呀~~~~~
老公 : 你唔記得當日邊個返工通宵無得訓。你就在家高床軟枕。。
邊個自己搭巴士轉幾程車返學返工。每天早7晚10。功課做通頂。你就訓先 ﹗
而家捱到喇。我舒服少少啫。你就唔抵得。叫我揾野做。。。
weak7...女人係賺錢買花帶架喎 !唔好激親老婆仔啦...!
[版主回覆02/24/2008 06:56:00]聽到未呀 死佬 ﹗﹗﹗﹗﹗ 真係英雄所見略同﹗ 不過生完仔之後。我都想做野既。 因為我要發展我既事業﹗同埋儲多點錢。兩公婆提早退休啦~ 始終在美國生活。屋企多個人做野差好遠架﹗﹗ 到時又有小朋友既支出。一個唔該買埋樓。有排供。。 其實我仲好想有自己label架﹗心底深處唔想放棄。不過。 到時有小朋友。又未必可以咁併博喇~ 老公叫我不如到時揾 d無咩壓力既工。例如銀行呀咁。。 唉。我就慘喇。又要湊仔。又要做d自己唔鐘意既野。。 唔怪得知人地話為左家庭。就要犧牲好多。而家開始明喇。。
傻瓜黎o既..,唔駛喊啦..weak7會好錫你..唔駛你做野住架啦..哈哈~~
我都好羨慕你兩個呀..不過我都好多謝你.. .睇你地o既blog成日都可以教到我好多野架…好似今次咁..我就學識應該點同自己心愛o既人相處啦…以前就係唔會好似你地咁斬晒d花花草草囉…就係咁..好快就分手了~~
不過經過呢d野..到而家我會好好珍惜身邊o既人架..點都係想佢地開心幸福囉~~我都祝福你兩個呀~~
[版主回覆02/25/2008 13:40:00]其實呢單野都幾攪笑既~ 佢唔知一講我就會喊架嘛~~ 哈~~ 係呀。兩人相處。信任好緊要。。 所以自己都要好謹慎。唔好令對方擔心囉。。 努力啦~ 揾到個值得珍惜既。就好好對佢喇~~
我相信Weak7都係口痕問下既….佢估唔到你會喊^.^
而佢又咁愛你又點捨得你做嘢呢
不過都算佢識得整色整水呢黎凑返你
[版主回覆02/25/2008 13:45:00]係呀。大反應d等佢唔敢再問丫嘛~ 一陣整慣左姿勢。成日問下問下就唔好喇~~ 哈~ 都唔係架。其實我地有講過。等小朋友1歲時。 我就會出黎做野架喇。。 因為都想兩公婆一齊揾錢。。 同埋唔做野好悶既。而家成日有功課就ok啦。。 但如果以後都在家。好無自己生活架嘛~~ 一陣變左不修邊幅既師奶。個死佬以為坐定粒六。 就無咁緊張我架喇~~ 哈哈~~ 女人要有吸引力。同生活圈子既~
我好認同你所講呀!
其實為了令對方有更多的安全感, 放棄身邊有一d較close的異性朋友都是應該的~ hahaha, 好鬼老土咁, 不過我都好驚d人有個好close的異性朋友, 成日兩個去街, 仲要話「喂! 你唔好咁多心啦! 我同佢係朋友咋喎!」
第一次黎你的blog, 你d婚紗相好靚呀! 我好鍾意睇人既婚紗相架, 因為我自己未影~~ 成日去去羨慕下人地影得幾咁靚, 幾咁sweet!!!!
[版主回覆02/25/2008 13:50:00]歡迎李太~~ 係呀。其實男仔同女仔都可以好好朋友既。。 不過就唔應該話成日要單獨出去。人地果個都唔鐘意啦~ (除非有叫另一半但佢唔去啦~) 其實邊d人危險。邊d人只係好朋友。feel到既。。 不過有咩大過自己身邊果個丫。如果會為左呢d嘈既。 都已經唔止係朋友咁簡單架喇~ 次前有個男仔朋友我日生送 i pod比我。我老公叫我唔好要。 仲斬走埋呢個朋友呀~~ 哈哈~~ 拿﹗唔係剩係女仔先會咁架~
你講得啱, 要得到一段好關係,就要放棄花花世界 , 我聽過人講愛情係受唔起考驗, 唔好嘗試考驗一段感情, 而係要好好保護佢, 我同地震依家都儘量少出夜街, 少異性朋友, 好似你地咁 放棄花花世界
weak7肯定唔抵得你咁"梳呼", 玩鬼你啦
[版主回覆02/25/2008 13:58:00]係呀。佢好鐘意突然激下我。我咪大返佢囉﹗﹗ 哈~~~ 你講得岩。唔好考驗愛情呀。無啦啦做咩要考驗啫~~ 傻左咩。有道裂痕補唔返架~~ 係囉。其實兩個人相愛。最好唔好比咁多外來野影響到。 特別是初初發展。但如果已經穩定左或結左婚。 就可以多返少少朋友空間。當然要自我監守啦﹗ 哈~~
唉~~有時覺得有得嘈重好
我嘈都無得嘈因為大家好少時間見面
[版主回覆02/25/2008 14:00:00]少見面咪珍惜多點囉。。 日嘈夜嘈。唔開心就有份。。
kelly,
你真係講得好好呀! 真係估唔到你新潮嘅軀殼下有咁成熟嘅思想!!
weak7有着你真係佢最大嘅福份啊!! 要好好珍惜啊!!
話時話, 你哋真係好犀利, 咁耐以嚟只係嘈過一次交 我同我老公係中學同學仔,今年將會係我倆結婚10週年; 我哋間唔中都會為d小事頂吓嘴, 同你哋相比真係醜死怪咯….
[版主回覆02/25/2008 14:59:00]其實為小事頂咀都無咩問題丫。。 有唔同意見都好正常~~ 我地無嘈交。我諗好大原因係因為我地都好就對方。 其實我就佢多架。佢知架﹗ 哈~ 不過講真。咩都有兩面。 我既意見唔一定最好。同埋我份人唔係好堅持。 唔會話一定要點點點。。 有野既話。唔好發脾氣咁講。 心平氣和咁討論就得架喇~ 除非大家唔再愛大家。否則。所有野都係附屬性。 不用太執著﹗ (係咪好蟬呢~ ) 哈哈~~ 祝你地結婚週年快樂呀﹗﹗﹗
唔該晒 Kelly 將我的疑團一一解開~ 真係形容得我好好 求知慾好強 好鬼客氣 . 其實我咁問都係想了解妳地班靚女多 D 嘛 !! 妳同 Weak7 咁耐以黎只嗌過一次交…直情係情侶, 夫婦既典範啦 !! 我就唔係喇, 初初頭幾個月, 同佢每隔三日一少嘈, 一個禮拜一大嘈o個 D黎架 !! 攪到我好痛苦, 成日喊到好似張相咁樣子, 簡直人都癲. 佢性格比較急燥, 好易敏. 而我真係好唔鍾意佢依一點, 想佢有番些少耐性, 唔好咁火爆~ 我又係衰既…太過執著於佢 !! 佢都話啦, 話我對周邊的人和事都冇乜所謂, 冇乜脾氣, 點解對佢又會咁喎?! 我話緊張你嘛~ 經過幾個月摸索期, 我倆都能因應對方的需求, 都會作出識量的讓. 依個讓字, 係段好既關係裡面一定不能少~ 我知佢變左好多, 讓我好多. 依刻佢讓我, 多過我讓佢 !! Weak7 打死你呀. 明知個老婆聽完你娘親的說話, 有些少唔高興架啦 !! 仲加多句落去. 你應該話: "唔緊要啦, 老公養妳啦", 咁講幾好呢~~~ Kelly 我想知 Weak7 問番妳係咪搬去落樓下個花糟度..有冇即時笑番呀? 俾著我一定忍唔到, 再唔係喊得再浮誇 D擒住
[版主回覆02/26/2008 04:30:00]咁你地都好受對方呀~ 會為一段關係改變同付出。。 世上太多自私既人喇。只想永遠被愛。想別人付出。 根本無可能。。 而家咪幾好。大家都就對方。值得 ﹗ 係啦。明知人地比奶奶激親。仲加多句。本身我無事架。 我都唔會放有心上。因為奶奶算是心直口快既人。 表達能力比較低。佢唔夠膽叫我做野架。哈哈。。 不過見個衰佬講埋一份。我先喊之嘛~~ 佢問我係咪搬落樓下。我都死忍笑架。。 之後我話 : 都係唔好搬住喇。呢兩日落雨。 我過兩日好天就搬落去架喇。你唔使送我。。" 之後佢突登走得好快咁開門。想快手關門唔比我入。 我就死命狂奔。又玩左一輛囉~~ 哈哈﹗﹗﹗
傻妹,你老公同你講下笑咋話,唔好喊啦
[版主回覆02/26/2008 13:12:00]唔知呀。喊左先算啦~ 我要表示不滿丫嘛~ 哈哈~~
傻妹…你老公見你cry成咁…都唔捨得要你做野呀…
呢排仲病緊呀…得閒再上黎啦….
[版主回覆02/26/2008 13:14:00]唔知架。佢得閒又問下我架喇~~ 哈~~ 你病成點呀?? 好返d 未呀??